Испания солиқ хизмати "Негрейра иши" деб номланган жараён бўйича ҳисоботни эълон қилди. Бу ҳақда "Barca Blaugranes" нашри хабар бермоқда.

Ҳисоботдан маълум бўлишича, "Барселона" томонидан Ҳакамлар техник қўмитасининг собиқ вице-президенти Хосе Негрейрага ўтказилган маблағлар ҳакамларга ёки ўйин натижаларига таъсир ўтказиш учун ишлатилганлиги ҳақида ҳеч қандай далил мавжуд эмас. Гап тахминан 7,5 миллион евро миқдоридаги маблағ ҳақида кетмоқда.

"Барселона" клуби аввалроқ барча тўловлар қонуний характерга эга бўлганини ва улар техник ҳамда таҳлилий ҳакамлик ҳисоботлари учун тўланганини таъкидлаган эди. Солиқ органларининг қайд этишича, юзага келиши мумкин бўлган молиявий қоидабузарликлар алоҳида текширувни талаб қилади, бироқ спорт коррупцияси ўз тасдиғини топмаган.

Мазкур иш бўйича якуний қарор ҳали ҳам суд томонидан қабул қилиниши кутилмоқда.