«Реал Мадрид» президентлигига номзод Энрике Рикельме Федерико Вальверде ва Орельен Тчуамени ўртасидаги можаро ҳақида ўз фикрларини билдирди.

Эслатиб ўтамиз, аввалроқ мадридликлар футболчилари 7 май куни машғулот чоғида муштлашиб кетгани, оқибатда уругвайлик футболчи бош мия жароҳати билан касалхонага ётқизилгани ва унга чок қўйилгани ҳақида хабар берилган эди. Футболчилар ўртасидаги зиддият ундан бир кун аввал бошланган. Клуб раҳбарияти ҳар иккала футболчини 500 минг евро миқдорида жаримага тортган.

— «Реал»нинг кийиниш хонасидаги муҳит бузилганми?

— Мен билмайман, чунки мен у ерда эмасман. «Муштлашувлар бўлиб туради, лекин маълумотлар ташқарига чиқиб кетиши нормал ҳолат эмас», дейишди. Менимча, муаммо маълумотларнинг сизиб чиқишида эмас. Муаммо шундаки, бундай вазиятлар юзага келяпти ва кийиниш хонасида буни нормал ҳолат сифатида қабул қилишмоқда. Тизимда нимадир нотўғри. Шунинг учун ҳам биз спорт ва молиявий барча жабҳаларни профессионал даражага олиб чиқишимиз керак. Ҳар бир бўлимида ўз ишининг усталари ишлайдиган, аниқ иерархияга эга ва бу иерархияга ҳурмат билан қарайдиган профессионал клубда бундай ҳолат юз бермаслиги керак.

— Яъни, сиз иерархияга риоя қилинмаётганини айтмоқчимисиз?

— «Реал» мухлиси сифатида шуни айта оламанки, ҳозирги кунда клубга иерархия, профессионаллар, қадриятлар ва ҳақиқий «Реал» руҳи етишмаяпти. Буларнинг барчаси йўқ.

— Вальверде ва Тчуамени ўртасидаги муштлашув ҳолатини қандай ҳал қилган бўлардингиз?

— Мен бу можаронинг тафсилотларини билмайман. Мен фақат матбуотда тарқалган гап-сўзлардан хабардорман ва уларнинг барчаси ҳақиқат эканлигига ишончим комил эмас. Барча тафсилотларни ва воқеанинг олди-ортини билмасдан туриб, ўз фикримни билдириш учун менда етарли маълумот йўқ, — деди Рикельме.