Будапешт полицияси Чемпионлар лигаси финали олдидан юз берган оммавий муштлашув иштирокчиларини аниқлаш учун видеокузатув камералари ёзувларини ўрганмоқда. 30 май куни ҳал қилувчи ўйинда Англиянинг «Арсенал» ва Франциянинг «ПСЖ» жамоалари ўзаро баҳс олиб боришади.
Ҳуқуқни муҳофаза қилувчи органлар маълумотига кўра, воқеа кечаси Венгрия пойтахти туманларидан бирида юз берган. Ижтимоий тармоқларда ҳар икки клубдан 30 нафардан мухлис иштирок этган муштлашув ва пиротехника воситалари қўлланилгани акс этган видеолар тарқалди.
Чемпионлар лигаси финали «Пушкаш Арена» стадионида бўлиб ўтади. Ўйин Тошкент вақти билан соат 21:00 да бошланиши режалаштирилган. Тартибни сақлаш учун шаҳарда 4 000 нафарга яқин полиция ходими хизмат қилади. Таъкидланишича, ушбу ўйин Венгрия тарихидаги энг катта бир кунлик полиция кучлари сафарбар қилинган тадбир бўлади.
