Эквадор футбол федерацияси (FEF) жорий йилги жаҳон чемпионатида иштирок этадиган 26 нафар футболчидан иборат якуний рўйхатни расман тақдим этди.
Терма жамоанинг мундиал учун қайдномаси ўзига хос тарзда — гуаякиллик таниқли хонанда Эктор Наполитано ижросидаги видеотақдимот орқали мухлисларга эълон қилинди. Жамоанинг юлдузли таркибидан Виллиан Пачо, Пьеро Инкапье ҳамда терма жамоа тарихидаги энг яхши тўпурар Эннер Валенсия каби таниқли номлар жой олган.
Бош мураббий Себастьян Беккасесе бу галги турнирга Европа яшил майдонларида тўп сураётган легионерлар ҳамда ички чемпионат вакилларидан иборат анча мувозанатлашган таркибни жалб этган. Жамоанинг асосий етакчиларидан бири, «Челси» ярим ҳимоячиси Мойзес Кайседо ҳам қайдномага киритилди. Аввалроқ унинг дисквалификацияси билан боғлиқ ноаниқликлар мавжуд эди, бироқ ФИФА футболчининг илк турданоқ майдонга тушиши мумкинлигини тасдиқлади.
Эквадорликлар ушбу жаҳон биринчилигида ўз тарихий натижаларини янгилашни мақсад қилган. Жамоа ўз тарихида фақат бир марта — 2006 йилда нимчорак финалгача етиб борган бўлса, 2002, 2014 ва 2022 йилги мундиалларни гуруҳ босқичидаёқ якунлашга мажбур бўлган. Жамоанинг энг кучли томони сифатида мустаҳкам ҳимоя чизиғи кўрилмоқда — эквадорликлар саралаш босқичида ўз дарвозаларидан бор-ёғи 5 та тўп ўтказиб юбориб, Жанубий Америка минтақасида энг яхши кўрсаткични қайд этишган.
Эквадор терма жамоасининг ЖЧ-2026 учун тўлиқ таркиби:
-
Дарвозабонлар: Эрнан Галиндес («Уракан»), Мойзес Рамирес («Кифисиа»), Гонсало Валье («ЛДУ Кито»).
-
Ҳимоячилар: Виллиан Пачо («ПСЖ»), Пьеро Инкапье («Арсенал»), Первис Эступиньян («Милан»), Хоэль Ордоньес («Брюгге»), Феликс Торрес («Интернасьонал»), Жексон Поросо («Тихуана»), Анхело Пресиадо («Атлетико Минейро»).
-
Ярим ҳимоячилар: Мойзес Кайседо («Челси»), Энтони Валенсия («Антверпен»), Дениль Кастильо («Мидтьюлланд»), Хорди Альсивар («Индепендьенте дель Валье»), Алан Франко («Атлетико Минейро»), Педро Вите («Пумас УНАМ»), Кендри Паэс («Ривер Плейт»), Алан Минда («Атлетико Минейро»), Яймар Медина («Генк»).
-
Ҳужумчилар: Гонсало Плата (« Фламенго»), Жон Йебоа («Венеция»), Нилсон Ангуло («Андерлехт»), Кевин Родригес («Юнион Сент-Жиллуаз»), Хорди Кайседо («Уракан»), Жереми Аревало («Штутгарт»), Эннер Валенсия («Пачука»).
