«Манчестер Сити» бошқарув раиси Ҳалдун ал Муборак бош мураббий Пеп Гвардиоланинг кетиши фонида клуб лойиҳаси ҳали ўз чўққисига этмаганини маълум қилди.

«Биз ҳали чўққига чиққанимиз йўқ. Ўн саккиз йил... Мен клубнинг 2008 йилдаги ҳолатига назар ташлайман, сўнгра охирги 18 йилнинг ҳар бир жиҳатини кўздан кечираман.

Роберто Манчини ушбу клубга илк АПЛ чемпионлигини тақдим этган эди. Биз ўша лаҳзаларни, ўша ажойиб даврни ва кўп йиллардан кейинги Англия Кубогидаги илк ғалабамизни ҳеч қачон унутмаймиз.

Кейин Мануэль Пеллегрини келди — худди шундай, яна бир АПЛ соврини ва янада каттароқ муваффақиятлар. Шундан сўнг Пеп Гвардиола келди ва биз мана шу менталитетни, мана шу ғолиб клуб ДНКсини қўлга киритдик.

Биз бунга ўрганиб қолганмиз, чунки ғалаба қозониш бизнинг ДНКмизга сингдирилган. Бу клуб ғалабалар учун яратилган ва қурилган.

Пепнинг бизга берган туҳфаси бизни бутунлай янги даражага олиб чиқди. Биз унга мана шундай тизимни қуришда ёрдам бергани учун жуда миннатдормиз», — деди Ҳалдун ал Муборак.