«Manchester Siti» boshqaruv raisi Haldun al Muborak bosh murabbiy Pep Gvardiolaning ketishi fonida klub loyihasi hali o‘z cho‘qqisiga etmaganini ma’lum qildi.
«Biz hali cho‘qqiga chiqqanimiz yo‘q. O‘n sakkiz yil... Men klubning 2008 yildagi holatiga nazar tashlayman, so‘ngra oxirgi 18 yilning har bir jihatini ko‘zdan kechiraman.
Roberto Manchini ushbu klubga ilk APL chempionligini taqdim etgan edi. Biz o‘sha lahzalarni, o‘sha ajoyib davrni va ko‘p yillardan keyingi Angliya Kubogidagi ilk g‘alabamizni hech qachon unutmaymiz.
Keyin Manuel Pellegrini keldi — xuddi shunday, yana bir APL sovrini va yanada kattaroq muvaffaqiyatlar. Shundan so‘ng Pep Gvardiola keldi va biz mana shu mentalitetni, mana shu g‘olib klub DNKsini qo‘lga kiritdik.
Biz bunga o‘rganib qolganmiz, chunki g‘alaba qozonish bizning DNKmizga singdirilgan. Bu klub g‘alabalar uchun yaratilgan va qurilgan.
Pepning bizga bergan tuhfasi bizni butunlay yangi darajaga olib chiqdi. Biz unga mana shunday tizimni qurishda yordam bergani uchun juda minnatdormiz», — dedi Haldun al Muborak.
