2026 йилги Жаҳон чемпионати мезбонларидан бири бўлган Канада терма жамоаси мундиал олдидан Ирландияга қарши ўртоқлик учрашуви ўтказди.
Монреаль шаҳрида бўлиб ўтган баҳс 1:1 ҳисобидаги дуранг натижа билан якунланди. Уй эгалари 23-дақиқада олдинга чиқиб олди — Ирландия ҳимоячиси Жейк О'Брайен ўз дарвозасини ишғол қилди. 60-дақиқада эса ирландлар ҳисобни тенглаштиришди. Гол муаллифи Трой Парротт бўлди.
Бундан аввалги ўртоқлик учрашувида Канада терма жамоаси Ўзбекистонни 2:0 ҳисобида мағлуб этган эди.
Эслатиб ўтамиз, 2026 йилги Жаҳон чемпионати АҚШ ва Мексика билан биргаликда Канадада ҳам ўтказилади. Турнир 11 июндан 19 июлгача давом этади.
Канада терма жамоаси В гуруҳидан жой олган бўлиб, унда Жесси Марш шогирдлари Босния ва Герцеговина, Қатар ҳамда Швейцария терма жамоаларига қарши баҳс олиб боради.













