Аргентина терма жамоаси бош мураббийи Лионель Скалони Жаҳон чемпионатига кўрилаётган тайёргарлик ҳақида гапирди. 7 июнь куни «альбиселесте» Гондурас билан ўртоқлик учрашувида майдонга тушади, орадан уч кун ўтиб эса мундиал стартидан олдинги сўнгги назорат баҳси бўлиб ўтади — унда Аргентинага Исландия рақиблик қилади.
«Исландияга қарши ўйиндан сўнг биз машғулотлар юкламаси ва шиддатини оширамиз. Футболчиларнинг бунга қандай муносабат билдиришини кузатамиз. Агар кимдир бунга тайёр эмаслиги маълум бўлса, уларни таркибдан чиқариб ташлашга мажбур бўламиз», — деди Скалони матбуот анжуманида.
Эслатиб ўтамиз, 17 июнь куни аргентиналиклар ЖЧ-2026 гуруҳ босқичи 1-тури доирасида Жазоир терма жамоасига қарши майдонга тушишади. Шунингдек, ушбу квартетдан Австрия ва Иордания терма жамоалари ҳам жой олган.
