Argentina terma jamoasi bosh murabbiyi Lionel Skaloni Jahon chempionatiga ko‘rilayotgan tayyorgarlik haqida gapirdi. 7 iyun kuni «albiseleste» Gonduras bilan o‘rtoqlik uchrashuvida maydonga tushadi, oradan uch kun o‘tib esa mundial startidan oldingi so‘nggi nazorat bahsi bo‘lib o‘tadi — unda Argentinaga Islandiya raqiblik qiladi.
«Islandiyaga qarshi o‘yindan so‘ng biz mashg‘ulotlar yuklamasi va shiddatini oshiramiz. Futbolchilarning bunga qanday munosabat bildirishini kuzatamiz. Agar kimdir bunga tayyor emasligi ma’lum bo‘lsa, ularni tarkibdan chiqarib tashlashga majbur bo‘lamiz», — dedi Skaloni matbuot anjumanida.
Eslatib o‘tamiz, 17 iyun kuni argentinaliklar JCH-2026 guruh bosqichi 1-turi doirasida Jazoir terma jamoasiga qarshi maydonga tushishadi. Shuningdek, ushbu kvartetdan Avstriya va Iordaniya terma jamoalari ham joy olgan.
