Бельгия терма жамоаси Жаҳон чемпионати олдидан ўтказилган ўртоқлик учрашувида Тунисни йирик ҳисобда мағлубиятга учратди.
Брюссель шаҳрида бўлиб ўтган баҳс мезбонларнинг 5:0 ҳисобидаги ишончли ғалабаси билан якунланди.
Ҳисоб 28-дақиқада Леандро Троссард томонидан очилди. Танаффусдан кейин бельгияликлар устунликни янада мустаҳкамлаб, Шарль Де Кетеларе ва Кевин Де Брёйне гол урди.
62-дақиқада Тунис терма жамоаси футболчиси Исмаэль Гарби иккинчи сариқ карточкасини олиб, майдонни тарк этди ва жамоасини бир киши кам бўлиб қолдирди.
Учрашувнинг сўнгги дақиқаларида Доди Лукебакио ва Николас Раскин ҳам ўз номини таблога ёздириб, ҳисобни йирик кўринишга келтирди.
Эслатиб ўтамиз, 2026 йилги Жаҳон чемпионатида Бельгия терма жамоаси G гуруҳида иштирок этади. Унинг рақиблари Эрон, Миср ва Янги Зеландия терма жамоалари бўлади.
Тунис эса F гуруҳидан жой олган бўлиб, Япония, Швеция ва Нидерландия терма жамоаларига қарши баҳс олиб боради.













