Belgiya terma jamoasi Jahon chempionati oldidan o‘tkazilgan o‘rtoqlik uchrashuvida Tunisni yirik hisobda mag‘lubiyatga uchratdi.
Bryussel shahrida bo‘lib o‘tgan bahs mezbonlarning 5:0 hisobidagi ishonchli g‘alabasi bilan yakunlandi.
Hisob 28-daqiqada Leandro Trossard tomonidan ochildi. Tanaffusdan keyin belgiyaliklar ustunlikni yanada mustahkamlab, Sharl De Ketelare va Kevin De Bryoyne gol urdi.
62-daqiqada Tunis terma jamoasi futbolchisi Ismael Garbi ikkinchi sariq kartochkasini olib, maydonni tark etdi va jamoasini bir kishi kam bo‘lib qoldirdi.
Uchrashuvning so‘nggi daqiqalarida Dodi Lukebakio va Nikolas Raskin ham o‘z nomini tabloga yozdirib, hisobni yirik ko‘rinishga keltirdi.
Eslatib o‘tamiz, 2026 yilgi Jahon chempionatida Belgiya terma jamoasi G guruhida ishtirok etadi. Uning raqiblari Eron, Misr va Yangi Zelandiya terma jamoalari bo‘ladi.
Tunis esa F guruhidan joy olgan bo‘lib, Yaponiya, Shvesiya va Niderlandiya terma jamoalariga qarshi bahs olib boradi.













