Transfermarkt портали 2026 йилги Жаҳон чемпионатида иштирок этадиган Осиё қитъаси терма жамоаларнинг умумий қийматларини эълон қилди. Унга кўра, Япония терма жамоаси футболчиларнинг трансфер қиймати бўйича биринчи ўринни эгаллаб турибди.
Қайд этилишича, “самурайлар” таркибидаги футболчиларнинг умумий қиймати 270,8 миллион еврога баҳоланган. Бу кўрсаткич бўйича иккинчи ўринни Корея Республикаси терма жамоаси (139,05 миллион евро), учинчи поғонани эса Ўзбекистон миллий терма жамоаси банд этган.
“Оқ бўрилар” таркибида Жаҳон чемпионатида иштирок этиш учун жалб этилган футболчиларнинг умумий қиймати 85,3 миллион еврони ташкил этган. Ушбу миқдорнинг катта қисми “Манчестер Сити” ҳимоячиси Абдуқодир Ҳусанов (50 млн евро) зиммасига тўғри келади.
Энг қиммат таркибга эга терма жамоалар:
1. Япония (270,8 млн евро)
2. Жанубий Корея (139,05 млн евро)
3. Ўзбекистон (85,3 млн евро)
4. Австралия (77,4 миллион евро)
5. Саудия Арабистони (40,6 миллион евро)
6. Эрон (32,05 миллион евро)
7. БАА (29,05 миллион евро)
8. Ироқ (21,2 миллион евро)
9. Иордания (20,3 миллион евро)
10. Қатар (19,9 миллион евро)
2026 йилги Жаҳон чемпионати 11 июндан 19 июлгача бўлиб ўтади. Турнир учрашувларига АҚШ, Канада ва Мексика биргаликда мезбонлик қилади. Бўлажак дунё биринчилигида тарихда илк бор 48 та миллий терма жамоа иштирок этади. Чемпионатнинг очилиш ўйини 11 июнь куни Мехикодаги “Ацтека” стадионида бўлиб ўтади ва унда Мексика ҳамда Жанубий Африка Республикаси (ЖАР) терма жамоалари ўзаро тўқнаш келади.
Маълумот учун, Ўзбекистон МТЖ мундиалдаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” 18 июнь куни биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади.
Жамоа иккинчи тур доирасида 23 июнь куни Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “Хюстон” стадионида ўтказилиши белгиланган. Гуруҳдаги сўнгги учрашув 28 июнь куни “Атланта” стадионида Конго Демократик Республикасига қарши бўлиб ўтади.
