Германия терма жамоаси дарвозабони Мануэль Нойер 2026 йилги Жаҳон чемпионати «Е» гуруҳи 1-туридан ўрин олган Кюрасао терма жамоасига қарши учрашувдаги ғалаба (7:1) ҳақида ўз таассуротлари билан ўртоқлашди.
Баҳс 14 июнь куни АҚШнинг Хьюстон шаҳридаги «NRG Stadium» стадионида бўлиб ўтди ва немисларнинг 7:1 ҳисобидаги ғалабаси билан якунланди. Германия ушбу натижа орқали турнирнинг финал босқичларида урилган голлар сони бўйича рекорд ўрнатди (239 та гол).
«Мен бу кунни жуда узоқ кутдим ва майдонга тушишга қатъий аҳд қилгандим. Йирик турнирларда доим муваффақиятли старт олиш ўта муҳим ҳисобланади. Биз яхши ўйин ўтказдик ва кўплаб голлар урдик. Захирадан майдонга қўшилган футболчилар ўйинга ажойиб энергия олиб киришди. Биз бир дақиқа бўлса ҳам кейинги голни уриш имкониятини қидиришдан тўхтамадик», — дея Нойернинг сўзларини келтиради Bayern&Germany нашри.
Шунингдек, 40 ёшли дарвозабон Кюрасао терма жамоаси томонидан киритилган голга ҳам тўхталиб ўтди.
«Мен ушбу зарбани қайтармоқчи эдим, аммо тўп рикошетдан сўнг йўналишини ўзгартирди, масофа эса реакция кўрсатиш учун жуда қисқалик қилди. Бу шунчаки бахтсиз ҳодиса эди», — дея қўшимча қилди у.
20 июнь куни Германия Жаҳон чемпионати доирасида Кот-д'Ивуарга қарши майдонга тушади, 25 июнь куни эса Эквадор билан куч синашади. Футбол бўйича Жаҳон чемпионати АҚШ, Канада ва Мексика мамлакатларида бўлиб ўтмоқда ва 19 июль куни якунига етади.
