«Барселона» ҳимоячиси Рональд Араухо мавсумнинг бир қисмини ўтказиб юборишига сабаб бўлган руҳий муаммолар ҳақидаги фикрлари билан ўртоқлашди. Футболчи 2025 йилнинг ноябрь ойида Чемпионлар Лигаси доирасида «Челси»га қарши кечган ўйиндан (0:3) сўнг клуб ихтиёрини тарк этган эди.
«Сизни ҳайратда қолдириши мумкин бўлган гапни айтаман. Майдонда кўп ўйнамаган бўлсам-да, бу мавсум мен учун энг фойдалиси бўлди.
Мен руҳий жиҳатдан сезиларли даражада улғайдим. Яхшироқ эр ва ота бўлишни, нарсаларга бошқача нигоҳ билан қарашни ҳамда устуворликларни тўғри белгилашни ўргандим.
Одамлар бизни футболчи бўлганимиз ва кўп пул топганимиз учун ҳеч қандай ташвишимиз йўқ деб ўйлашади, лекин бу ундай эмас. Футбол оламида жуда кўп нарсалар содир бўлади ва буларнинг барчаси йиғилиб, стрессни келтириб чиқаради. Чоршанба куни дунёнинг энг яхши футболчиси бўлишингиз мумкин, шанба куни эса ютқазиб, энг ёмонига айланасиз», – деди Рональд Араухо.
