Франция миллий терма жамоаси ҳужумчиси Килиан Мбаппе Жаҳон чемпионатларида Германия терма жамоасининг собиқ форварди Мирослав Клозега тегишли бўлган рекордни янгилаш имкониятлари қай даражада эканлиги ҳақида гапирди. Ҳозирги кунда Клозе ҳисобида 16 та гол мавжуд бўлса, 27 ёшли Килианда бу кўрсаткич 12 тани ташкил этади.

“Ҳамма фақат шу ҳақида гапиряпти. Аммо ҳаётимда биринчи марта қандайдир рекорд менга эришиб бўлмасдек туюлмоқда. 27 ёшимда ва иккита Жаҳон чемпионатидан сўнг турнир тарихидаги энг яхши тўпурар бўлиш имкониятига эга бўлиб турганимни ўйлашнинг ўзи ақл бовар қилмас ҳолат.

Аммо шуни яхши биламанки, Жаҳон чемпионатида ғалаба қозонишдан кўра кучлироқ ҳис-туйғу йўқ. Шу сабабли менинг асосий мақсадим — Франция терма жамоасига учинчи юлдузни олиб келиш, уйга Кубок билан қайтиш ва мухлисларимизга унутилмас ёзни ҳадя қилишдир. Жаҳон чемпионатларининг энг яхши тўпурари бўлиш эса... Бу — тарихда мангу қолиш демакдир”, дея фикр билдиради 27 ёшли ҳужумчи.

Маълумот учун, Жаҳон чемпионатининг гуруҳ босқичида Франция терма жамоаси Сенегал, Норвегия ва Ироқ билан куч синашади. Французлар турнирдаги ўзининг дастлабки учрашувини 16 июнь куни Сенегал терма жамоасига қарши ўтказади.