Ўзбекистон миллий терма жамоаси ҳимоячиси Рустам Ашурматов интервью бериб, бир ойдан ошиқ давом этган йиғиндаги жисмоний юкламалар ҳақида гапирди.
"Бу даражадаги юкламалар босқичма-босқич ошиб борди. Тошкентда йиғилганимиз бизга жуда катта фойда бўлди. Эронда ўйнаётган футболчиларимиз учун ҳам яхши йиғин бўлди, чунки 2-3 ой катта майдонга чиқа олмадик. Ўзбекистон чемпионатида ўйнаётган футболчиларда ҳам йиғин бошида ҳолат анча ёмон эди. Машғулотлар давомида баъзи футболчиларнинг айтишича, бу уларнинг фаолиятидаги энг қийин йиғин бўлди. Мен ҳам уларнинг фикрларига қисман қўшиламан.
Жамоадошларимда машғулотлардан кейин қаттиқ чарчоқ ва кўнгил айниши кузатилди. Бу оммага чиқмаган бўлиши мумкин, лекин ҳозирги ҳолатга келишимизга бу йиғин катта ёрдам берди. Ҳозирда анча яхши жисмоний ҳолатдамиз", деди Рустам.
Ўзбекистон Жаҳон чемпионатини 18-июнь куни Колумбияга қарши ўйин билан бошлайди. Мазкур баҳс Тошкент вақти билан 7:00'да бошланиши режалаштирилган.
