O‘zbekiston milliy terma jamoasi himoyachisi Rustam Ashurmatov intervyu berib, bir oydan oshiq davom etgan yig‘indagi jismoniy yuklamalar haqida gapirdi.
"Bu darajadagi yuklamalar bosqichma-bosqich oshib bordi. Toshkentda yig‘ilganimiz bizga juda katta foyda bo‘ldi. Eronda o‘ynayotgan futbolchilarimiz uchun ham yaxshi yig‘in bo‘ldi, chunki 2-3 oy katta maydonga chiqa olmadik. O‘zbekiston chempionatida o‘ynayotgan futbolchilarda ham yig‘in boshida holat ancha yomon edi. Mashg‘ulotlar davomida ba’zi futbolchilarning aytishicha, bu ularning faoliyatidagi eng qiyin yig‘in bo‘ldi. Men ham ularning fikrlariga qisman qo‘shilaman.
Jamoadoshlarimda mashg‘ulotlardan keyin qattiq charchoq va ko‘ngil aynishi kuzatildi. Bu ommaga chiqmagan bo‘lishi mumkin, lekin hozirgi holatga kelishimizga bu yig‘in katta yordam berdi. Hozirda ancha yaxshi jismoniy holatdamiz", dedi Rustam.
O‘zbekiston Jahon chempionatini 18-iyun kuni Kolumbiyaga qarshi o‘yin bilan boshlaydi. Mazkur bahs Toshkent vaqti bilan 7:00'da boshlanishi rejalashtirilgan.
