Франция терма жамоаси собиқ ҳимоячиси Гаэль Клиши Португалия ва Конго ДР терма жамоалари ўртасидаги дуранг натижага муносабат билдирди. Жамоалар Жаҳон чемпионати гуруҳ босқичининг 1-турида 1:1 ҳисобида дуранг ўйнашди.
«Умуман олганда, бу Конго ДР учун ажойиб натижа. Менимча, жамоа жуда яхши ўйин ўтказди. Португалияда эса Роберто Мартинеснинг айрим қарорлари бўйича саволлар туғилиши аниқ. Конголик футболчиларнинг меҳнатини эътироф этиш керак, чунки бу жамоа учрашувда бемалол ғалаба қозониши ҳам мумкин эди», — деди Клиши BBC эфирида.
Конго ДР терма жамоаси ўз тарихида илк бор Жаҳон чемпионатларидаги биринчи очкосини қўлга киритди. Улар ўзларининг дебют мусобақаси бўлган 1974 йилги мундиалда 3 та ўйиннинг барчасида мағлуб бўлиб, ўз дарвозаларидан жавобсиз 14 та тўп олиб чиқишган эди.
