Швейцария миллий терма жамоаси ЖЧ-2026 гуруҳ босқичи 2-туридан ўрин олган учрашувда Босния ва Герцеговина терма жамоаси устидан 4:1 ҳисобида ишончли ғалабани қўлга киритди.
Швейцарияликлар таркибида Йохан Манзамби дубль муаллифига айланди. 20 ёшли ярим ҳимоячи захирадан майдонга тушганидан атиги уч дақиқа ўтиб, учрашувнинг 74-дақиқасида ҳисобни очган бўлса, 90-дақиқада ўз ҳисобига иккинчи голни ёздириб қўйди. Жамоанинг яна бир голига 84-дақиқада Рубен Варгас муаллифлик қилди. Учрашувдаги якуний ҳисобни эса ҳакам томонидан қўшиб берилган вақтда Гранит Жака пенальтини аниқ амалга оширган ҳолда ўрнатди.
Боснияликларнинг ягона голини 90+3-дақиқада Эрмин Махмич киритди. Эътиборлиси, Сергей Барбарез шогирдлари баҳсни 10 киши бўлиб якунлашди — 80-дақиқада ҳимоячи Тарик Муҳаремович қизил карточка олиб, майдондан четлатилган эди.
Ушбу ғалабадан сўнг Швейцария (4 очко) икки ўйиндан кейин «B» гуруҳида пешқадамликни қўлга олди. Босния ва Герцеговина эса 1 очко билан квартетда учинчи ўринда бормоқда.
Гуруҳ босқичининг сўнгги турида, 24 июнь куни швейцарияликлар Канадага қарши майдонга тушишса, боснияликлар шу куни Қатар терма жамоаси билан куч синашадилар.
ШВЕЙЦАРИЯ — БОСНИЯ ВА ГЕРЦЕГОВИНА — 4:1
Голлар: Манзамби 74 (1:0), Варгас 84 (2:0), Манзамби 90 (3:0), Махмич 90+3 (3:1), Жака 90+7-пен (4:1).
Швейцария: Кобель, Эльведи, Аканджи, Родригес, Видмер (Хакес, 86), Жака, Фройлер, Эбишер (Манзамби, 72), Ндой (Соу, 72), Эмболо (Иттен, 89), Ридер (Варгас, 72).
Босния ва Герцеговина: Василь, Мухаремович, Катич, Колашинац, Дедич, Тахирович (Башич, 63), Шуньич (Хаджиахметович, 85), Алайбегович (Махмич, 90+1), Мемич, Демирович (Лукич, 85), Джеко (Байрактаревич, 63).
Огоҳлантиришлар: Эльведи (65) — Дедич (59), Жеко (61).
Четлатиш: Мухаремович (80).
