Аргентина — Жазоир (3:0) учрашувидан кейин Лионель Мессининг ҳаракати бутун дунё мухлисларининг таҳсинига сазовор бўлди.

«Албиселесте» сардори Лионель Месси учрашувда хет-трик қайд этди. У 17-дақиқада Родриго Де Паулнинг узатмасидан кейин ҳисобни очган бўлса, 60 ва 76-дақиқаларда яна икки бор рақиб дарвозасини ишғол қилди. Учинчи голда Николас Гонсалес ассист муаллифи бўлди.

38 ёшли юлдуз 80-дақиқада майдонни тарк этди ва унинг ўрнига Нико Пас ўйинга қўшилди.

Қизиқ ҳолат шундаки, захира ўриндиғида бўш жой қолмаган эди. Ҳужумчи Тьяго Алмада ўз ўрнини Мессига таклиф қилди. Бироқ саккиз карра «Олтин тўп» соҳиби бу таклифни рад этди ва жамоадошлари ёнида майсага ўтиришни афзал кўрди.

Бу ҳаракат ижтимоий тармоқларда кенг муҳокама қилиниб, мухлислар томонидан катта ҳурмат билан қарши олинди.

Шунингдек, мазкур хет-трик орқали Месси жаҳон чемпионатлари тарихидаги голлари сонини 16 тага етказди ва Германия терма жамоасининг собиқ ҳужумчиси Мирослав Клозенинг рекордига тенглашди.