Парагвай терма жамоаси ноёб натижа қайд этди. Жанубий Америка вакиллари Жаҳон чемпионати–2026 гуруҳ босқичининг 2-турида Туркия устидан 1:0 ҳисобида ғалаба қозонишди. Эътиборлиси, парагвайликлар биринчи бўлим охиридан бошлаб майдонда ўн киши бўлиб ҳаракат қилишган эди.

Opta таҳлилий марказининг маълумотларига кўра, XXI асрда фақат учта жамоа бундай ишни уддалай олган: 2002 йилда ўша Парагвай (Словенияга қарши, 3:1), 2006 йилда Португалия (Нидерландияга қарши, 1:0) ва 2014 йилда Бельгия (Жанубий Кореяга қарши, 1:0).

Туркияга қарши баҳсда Парагвай терма жамоаси рақибнинг 32 та зарбасига жавобан бор-йўғи 7 та зарба берди. Тўп назорати эса бор-йўғи 22 фоизни ташкил этди, бироқ шунга қарамай, улар ўз дарвозалари дахлсизлигини сақлаб қола билишди.

Гуруҳ босқичининг сўнгги турида Парагвай терма жамоаси Австралияга қарши майдонга тушади.