Аргентина терма жамоаси афсонаси Лионель Месси фаолиятини якунлашидан олдин яна бир бор «Барселона» либосида майдонга тушиши мумкин.

El Nacional нашрининг хабар беришича, «Интер Майами» ва «Барселона» раҳбарияти Жоан Гампер кубоги учун учрашув ташкил этиш масаласини муҳокама қилмоқда. Музокаралар доирасида қизиқарли ғоя ҳам кўриб чиқилмоқда: Месси мазкур баҳснинг бир бўлимини «Интер Майами», иккинчи бўлимини эса «Барселона» сафида ўтказиши мумкин.

Маълумотларга кўра, саккиз карра «Олтин тўп» соҳиби профессионал фаолиятини айнан «Интер Майами»да якунлаши кутилмоқда. Бироқ «Барселона»га қарши эҳтимолий учрашув аргентиналик юлдуз учун Каталония клуби билан рамзий хайрлашувга айланиши мумкин.

Эслатиб ўтамиз, Месси «Барселона» асосий жамоасида 2004 йилдан 2021 йилгача тўп сурган. У шу давр мобайнида клуб сафида 778 та расмий учрашувда қатнашиб, 672 та гол урган ва жамоа тарихидаги энг яхши тўпурарга айланган.

Шунингдек, Месси каталонияликлар билан биргаликда 35 та совринни қўлга киритган. Улар орасида Испания чемпионатининг 10 та, Испания Кубогининг 7 та ва Чемпионлар лигасининг 4 та бош соврини бор.