Бразилия терма жамоаси футболчиси Неймар Винисиус Жуниорнинг Жаҳон чемпионатидаги муваффақиятлари ҳақида нима деб ўйлашини айтиб ўтди.
Мадриднинг "Реал" клуби вингери ЖЧ-2026 гуруҳ босқичининг учинчи туридан ўрин олган Шотландияга қарши баҳсда (3:0) дубль қайд этди. 25 ёшли футболчи турнирнинг учта учрашувида жами тўртта гол ва битта голли узатмани ўз ҳисобига ёздириб қўйишга улгурди.
"Винисиус – бизнинг юлдузимиз. У учрашувлар тақдирини бир ўзи ҳал қила олади", – дея Неймар ўйиндан кейинги матбуот анжуманида жамоадоши ҳақидаги фикрлари билан ўртоқлашди.
Неймарнинг ўзи Шотландия билан ўйиннинг иккинчи бўлимида захирадан майдонга тушиб, жорий мундиалдаги дебютини нишонлади.
Бразилия етти очко жамғариб, "C" квартетида биринчи ўринни эгаллади.
