Мадриднинг "Реал" клуби собиқ ҳужумчиси, ҳозирда Қатарнинг "Ал-Гарафа" жамоасида тўп сураётган Хоселу Икер Касильяснинг Bajo los Palos подкастида Қатар клубига ўтиш у учун жуда оғир бўлганини тан олди.
"Реал"ни тарк этиш қарори бутун умр менга оғирлик қилади, чунки у ерда бошдан кечирганларимни бошқа ҳеч қачон ҳис қила олмайман. Аммо ҳозирги вақтда фарзандларим, аёлим ва уларнинг келажаги ҳақида қайғуриш мен учун ҳар қандай спорт масаласидан устундир", — деди Хоселу.
Шунингдек, форвард совринлар учун курашишдаги ва лигада жон сақлаб қолиш учун курашишдаги босимни ўзаро солиштирди ва ҳар доим биринчи вариантни афзал кўришини маълум қилди.
Эслатиб ўтамиз, Хоселу 2023/2024 йилги мавсумда "Реал" шарафини ҳимоя қилган. У 49 та учрашувда 18 та гол уриб, клуб билан бирга Чемпионлар лигаси, Ла Лига ва Испания Суперкубогида ғолиб чиққан эди.
