Португалия терма жамоаси Ўзбекистон терма жамоасини 5:0 ҳисобида тор-мор этди, "Милан" ҳужумчиси Рафаэл Леау эса гол уришга муваффақ бўлди — у ўз клубида анчадан бери бундай қила олмаётган эди. Унинг бу муваффақиятини "Милан" раҳбарларидан бири, ўтмишда Леаунинг жамоадоши бўлган Златан Ибраҳимович шарҳлади.
"Мен Леау ва унинг голи учун хурсандман. У шундай ўйнаган вақтида, менинг фикримча, дунёнинг энг зўр футболчиларидан бирига айланади. Муваффақиятлар ўзига бўлган ишончни ошириш учун жуда зарур", — дея Ибраҳимовичнинг сўзларини келтиради pianetamilan.it.
Эслатиб ўтамиз, Леау 2019 йилдан буён "Милан" шарафини ҳимоя қилиб келмоқда. У ушбу клуб билан биргаликда 2022 йилда, жамоани Стефано Пиоли бошқарган вақтда Италия чемпионига айланган эди.
