Portugaliya terma jamoasi O‘zbekiston terma jamoasini 5:0 hisobida tor-mor etdi, "Milan" hujumchisi Rafael Leau esa gol urishga muvaffaq bo‘ldi — u o‘z klubida anchadan beri bunday qila olmayotgan edi. Uning bu muvaffaqiyatini "Milan" rahbarlaridan biri, o‘tmishda Leauning jamoadoshi bo‘lgan Zlatan Ibrahimovich sharhladi.
"Men Leau va uning goli uchun xursandman. U shunday o‘ynagan vaqtida, mening fikrimcha, dunyoning eng zo‘r futbolchilaridan biriga aylanadi. Muvaffaqiyatlar o‘ziga bo‘lgan ishonchni oshirish uchun juda zarur", — deya Ibrahimovichning so‘zlarini keltiradi pianetamilan.it.
Eslatib o‘tamiz, Leau 2019 yildan buyon "Milan" sharafini himoya qilib kelmoqda. U ushbu klub bilan birgalikda 2022 yilda, jamoani Stefano Pioli boshqargan vaqtda Italiya chempioniga aylangan edi.
