Килиан Мбаппе Франция терма жамоасида жуда муҳим ролни ўйнамоқда, чунки у, жумладан, жамоанинг ҳимояланиш ҳаракатларида ҳам фаол иштирок этмоқда. Бу ҳақда французлар бош мураббийи Дидье Дешам гапириб ўтди.
Мутахассиснинг таъкидлашича, ҳужумчи айни пайтда ажойиб спорт формасида ва жамоа сардори сифатида қолганларга ўрнак бўлмоқда.
«Килиан ҳимояда ҳам борини бериб ишлаяпти. Мен буни сизларга анча олдин айтган эдим: Килиан ўз маҳорати ва гол уриш қобилиятидан ташқари, сардорлик масъулиятини ҳам тўлиқ ўз зиммасига олди», — дея Дешамнинг сўзларини келтиради RMC Sport нашри.
Эслатиб ўтамиз, 2026 йилги Жаҳон чемпионатида Мбаппе аллақачон 4 та гол уришга улгурди. Франция ва Швеция ўртасидаги баҳс 1 июлга ўтар кечаси, Тошкент вақти билан соат 02:00 да бошланади.
