37 ёшли ҳужумчи Роберт Левандовски — Американинг «Чикаго Файр» клуби футболчиси. Бу ҳақда польшалик юлдузнинг янги жамоаси матбуот хизмати расман хабар бермоқда.

Робертнинг Чикаго клуби билан тузган шартномаси 2027/28 йилги мавсум якунига қадар мўлжалланган. Мазкур жамоа МЛС мунтазам чемпионатининг Шарқий конференцияси вакили ҳисобланади.

Эслатиб ўтамиз, Роберт сўнгги тўрт йилни «Барселона»да ўтказган эди. Бунгача у Познаннинг «Лех», Дортмунднинг «Боруссия» ва Мюнхеннинг «Бавария» клубларида тўп сурган.

Левандовски — ўн карра Германия чемпиони, уч карра Испания чемпиони ҳамда УЕФА Чемпионлар лигаси ғолиби ҳисобланади. У фаолияти давомида жами 30 тадан ортиқ совринни қўлга киритган.