Хорватия терма жамоаси ярим ҳимоячиси Иван Перишич ЖЧ–2026 1/16 финалидан ўрин олган Португалияга қарши учрашувда (1:2) ўз номи билан тарихга кирди.
Учрашувнинг 53-дақиқасида Перишич ҳисобни очди. У жарима майдончаси ичида тўпни қабул қилиб, чап оёғида аниқ зарба йўллади.
Шу тариқа, Перишич жаҳон чемпионатлари доирасида Хорватия терма жамоаси сафида еттинчи голини урди ва миллий жамоа рекордини янгилади. У 1998 йилги мундиалда олтита гол урган Давор Шукерни ортда қолдирди.
Перишич иштирок этган тўртта жаҳон чемпионатининг барчасида гол урган:
- ЖЧ–2014 — 2 гол;
- ЖЧ–2018 — 3 гол;
- ЖЧ–2022 — 1 гол;
- ЖЧ–2026 — 1 гол.
Хорватия терма жамоасининг жаҳон чемпионатлари тарихидаги энг яхши тўпурарлари рўйхатида учинчи ўринни бешта гол билан Марио Манжукич эгаллаб турибди.













