Криштиану Роналду навбатдаги жаҳон чемпионатида иштирок этиш ниятида эмас. Португалиялик юлдуз футболчи давом этаётган мундиал унинг фаолиятидаги охиргиси бўлишини айтди.
«Бу менинг охирги жаҳон чемпионатим», — дея Роналдунинг матбуот анжуманидаги сўзларини келтиради The Touchline нашри.
Навбатдаги жаҳон чемпионати 2030 йилда бўлиб ўтади ва ўша пайтда Криштиану Роналду 45 ёшда бўлади. Аввалроқ матбуотда португалиялик ҳужумчининг тўрт йилдан кейинги мундиалда ҳам иштирок этишини инкор этмаётгани ҳақида миш-мишлар тарқалган эди. Ўша вақтга келиб Роналдунинг ўғли ҳам Португалия терма жамоаси даражасигача ўсиши мумкин эди.
Ҳозирда 41 ёшли Криштиану Роналду ва Португалия терма жамоасининг бошқа футболчилари ЖЧ-2026 1/8 финали доирасида Испанияга қарши кечадиган баҳсга тайёргарлик кўришмоқда.
