Англия терма жамоаси ярим ҳимоячиси Жордан Хендерсон Жаҳон чемпионатида кутилмаган ва ғалати жароҳат олди. Нимчорак финалда Мексика устидан қозонилган ғалабани (3:2) нишонлаш вақтида, Хендерсон реклама тўсиғидан сакраб ўтаётиб, эҳтиётсизлик оқибатида йиқилиб тушган. Натижада у билагини шикастлаб олди. Жорданни майдондан замбилда олиб чиқиб кетишди, ҳатто унга кислород маскаси ҳам тақишга тўғри келди.
The Athletic нашрининг хабар беришича, ушбу жароҳатдан сўнг Хендерсон жарроҳат амалиётини ўтказиши керак. Катта эҳтимол билан, Жордан жорий мундиалда бошқа майдонга туша олмайди.
ЖЧ-2026 доирасида Жордан Хендерсон майдонда бор-йўғи олти дақиқа ҳаракат қилди холос — бу Панамага қарши баҳсда юз берганди. Қолган барча вақтни 36 ёшли ярим ҳимоячи захира ўриндиғида ўтказди.
