АҚШ терма жамоаси бош мураббийи Маурисио Почеттино Бельгия билан ўйиндан сўнг ўз фикрларини билдирди.
«Дастлабки дақиқалардан бошлаб, ўйинга киришиб кета олмаганимизни ҳамма кўрди. Биз учрашувда умуман иштирок этмагандек эдик. Ҳатто гол урган вақтимизда ҳам, кейинги ҳужумнинг ўзидаёқ гол ўтказиб юбордик. Бошиданоқ жуда қийин бўлди.
Бельгияни табриклайман, улар биздан устун эдилар. Бу бизнинг кунимиз эмасди. Бу баҳона излаш эмас, бу — ҳақиқат.
Биз бундан хулоса чиқаришимиз керак. Бу ўйинни таҳлил қилиш ва нима учун учрашувга тўғри ёндаша олмаганимизни тушуниш учун ўзига хос сабоқ жараёнидир. Бунинг сабаблари турлича, балки тушунтириш жуда оддийдир: на жамоавий, на индивидуал жиҳатдан бу бизнинг кунимиз эмасди. Асосий масъулият менинг бўйнимда. Вазиятни таҳлил қилишимиз ва бу биз одатда кўрсатадиган ўйин ёки услуб эмаслигини тушуниб етишимиз лозим», — деди Почеттино матбуот анжуманида.
