AQSH terma jamoasi bosh murabbiyi Maurisio Pochettino Belgiya bilan o‘yindan so‘ng o‘z fikrlarini bildirdi.
«Dastlabki daqiqalardan boshlab, o‘yinga kirishib keta olmaganimizni hamma ko‘rdi. Biz uchrashuvda umuman ishtirok etmagandek edik. Hatto gol urgan vaqtimizda ham, keyingi hujumning o‘zidayoq gol o‘tkazib yubordik. Boshidanoq juda qiyin bo‘ldi.
Belgiyani tabriklayman, ular bizdan ustun edilar. Bu bizning kunimiz emasdi. Bu bahona izlash emas, bu — haqiqat.
Biz bundan xulosa chiqarishimiz kerak. Bu o‘yinni tahlil qilish va nima uchun uchrashuvga to‘g‘ri yondasha olmaganimizni tushunish uchun o‘ziga xos saboq jarayonidir. Buning sabablari turlicha, balki tushuntirish juda oddiydir: na jamoaviy, na individual jihatdan bu bizning kunimiz emasdi. Asosiy mas’uliyat mening bo‘ynimda. Vaziyatni tahlil qilishimiz va bu biz odatda ko‘rsatadigan o‘yin yoki uslub emasligini tushunib yetishimiz lozim», — dedi Pochettino matbuot anjumanida.
