Англия терма жамоаси бош мураббийи Томас Тухель ЖЧ-2026 ярим финалига чиққанидан сўнг ўз ҳиссиётлари билан ўртоқлашди. Чорак финалда англияликлар Норвегияни 2:1 ҳисобида мағлуб этишди.
«Бу жуда катта босим, аммо менга бу ёқади. Жамоани майдонга бошлаб чиқиш, у ерда бўлиш… Ўйин олдидан охирги икки-уч дақиқада, тайёргарлик якунланиб, майдонга чиққанимда, ўзимни ҳақиқатдан ҳам тирик ҳис қиламан. Мен айнан шу ерда бўлишни истайман. Бу дақиқаларда дунёнинг бошқа ҳеч қаерида бўлишни хоҳламасдим.
Менга бу жуда ёқади, лекин ҳар уч-тўрт кунда ўтадиган плей-офф ўйинлари, албатта, мутлақо бошқа даражадаги босим ва ҳақиқий ҳиссий тебранишлардир. Мен буни тан оламан, шунинг учун ҳозир менга ҳам бироз вақт керак. Биз футболчиларга тўлиқ тикланиш учун вақт берамиз ва энг кечи билан бугун куннинг иккинчи ярмида мураббийлар штаби билан ярим финалга тайёргарликни бошлаймиз», — дея Тухель сўзларидан иқтибос келтиради ESPN.
ЖЧ-2026 11 июндан 19 июлгача Мексика, Канада ва АҚШда бўлиб ўтмоқда. Ярим финалда Англия терма жамоаси Аргентинага қарши баҳс олиб боради.
