Туркманистон давлат ахборот агентлиги (TDH) Тошкентнинг «Пахтакор» футбол клуби ўсмирлар жамоасини Ўзбекистон ўсмирлар терма жамоаси сифатида таништирди.

«Пахтакор» футбол клуби расмий сайти хабарига кўра, клубнинг 1997 йилда туғилган футболчилардан ташкил топган ўсмирлар жамоаси Туркманистон пойтахти Ашхобод шаҳрида ташкил этилган «Президент Кубоги» баҳсларида иштирок этмоқда.

TDH’нинг эса, ўз навбатида, «Президент Кубоги» баҳсларида Туркманистон, Беларусь, Тожикистон, Қирғизистон, Эрон, Кувайт, Россия ва Ўзбекистон ўсмирлар терма жамоалари иштирок этаётгани ҳақида хабар берган. Бироқ агентлик томонидан эълон қилинган фотосуратларда «Пахтакор» футбол клуби тўп сураётгани кўриниб турибди.

10 сентябрь куни мусобақа старт олган. Унда «Пахтакор» тарбияланувчилари, TDH хабарига кўра, Беларусь ўсмирлар терма жамоасига қарши майдонга чиқиб, 2:1 ҳисобида ғалаба қозонган. «Пахтакор» голларига Д. Юсупов ва С. Давлатжонов муаллифлик қилган.

«Пахтакор» мусобақанинг «А» гуруҳидан ўрин олган бўлиб, биринчи ўйин куни ушбу гуруҳ доирасида Россия ва Тожикистон терма жамоалари ўртасидаги ўйин ҳам бўлиб ўтган. Унда руслар 7:0 ҳисобида ғалаба қозонишган.