Франция терма жамоаси бош мураббийи Дидье Дешам ЖЧ–2026 учинчи ўрин учун кечган Англияга қарши баҳсдаги (4:6) мағлубиятдан кейин ўз фикрлари билан ўртоқлашди. Бу учрашув мутахассис учун миллий жамоа бошқарувидаги сўнгги ўйин бўлди.
«Мағлубият ҳар доим ёқимсиз. Шунга қарамай, бажарилган ишдан қониқиш ҳисси бор. Албатта, турнирни учинчи ўрин билан якунлаганимиз яхшироқ бўларди.
Бизда катта мақсадлар бор эди ва кўп яхши ишларга эришдик. Испанияга қарши баҳсда ўз ўйинимизни намойиш эта олмадик, рақиб эса бизга қарши жуда яхши ҳаракат қилди.
Барчаси ёмон эмас. Бизда иқтидорли жамоа бор ва натижага эришиш учун барча имкониятлар мавжуд эди. Шахсан мен учун бу ажойиб саёҳат бўлди. Аъло даражадаги саккиз ҳафта.
Натижа нуқтаи назаридан, албатта, афсусдамиз. Биз ўнлаб миллионлаб француз мухлисларига қувонч бағишлаш имконига эга эдик. Бу — жаҳон чемпионати. Ундан ортиқ нуфузли мусобақа йўқ. Франция терма жамоаси либосини кийишдан ортиқ шараф ҳам йўқ», — деди Дешам.
Эслатиб ўтамиз, Дидье Дешам Франция терма жамоасини 14 йил давомида бошқарди. Унинг қўл остида французлар 2018 йилги жаҳон чемпионатида ғолиб чиққан, 2022 йилги мундиалда финалга чиққан, Евро–2016 финалчиси бўлган ва 2021 йилда УЕФА Миллатлар лигасида ғалаба қозонган. Шунингдек, Франция терма жамоаси ЖЧ–2014дан бери илк бор жаҳон чемпионатини медалсиз якунлади.
