ФИФА расмий сайти мундиал дебютантларидан бири бўлган Ўзбекистон миллий терма жамоасининг ЖЧ-2026 даги иштирокига эътибор қаратди.
АҚШ, Канада ва Мексика яшил майдонларида ўтказилган футбол бўйича Жаҳон чемпионатида Ўзбекистон миллий терма жамоаси ўз тарихида илк бор иштирок этди. Халқаро футбол федерацияси (ФИФА) ўз расмий манбасида Осиё қитъаси вакилларининг иштирокига тўхталиб, “Оқ бўрилар”нинг турнирдаги тарихий қадамларини алоҳида эътироф этди.
Мусобақанинг гуруҳ босқичида кетма-кет учта мағлубиятга учраб, ЖЧ билан эрта хайрлашган бўлса-да, Фабио Каннаваро шогирдлари ижобий таассурот қолдира олишди.
Айниқса, жамоа аъзоларининг индивидуал маҳорати жаҳон жамоатчилиги эътиборини тортди:
-
Аббосбек Файзуллаев Колумбия терма жамоаси дарвозасига гол уриб, Ўзбекистоннинг Жаҳон чемпионатларидаги илк голи муаллифи сифатида мамлакат футбол тарихидан жой олди.
-
Элдор Шомуродов томонидан Конго ДР терма жамоаси дарвозасига йўлланган ажойиб зарба эса “Hyundai” томонидан ўтказилган сўровномада “Турнирнинг гуруҳ босқичидаги энг яхши голи” деб топилди.
ФИФА таҳлилчиларининг таъкидлашича, Ўзбекистон терма жамоаси мусобақа давомида ўзининг мураккаб, техник ва меҳнаткаш ўйин услубига содиқ қолди. Баҳслар давомида юқори темп ва жисмоний толиқиш ўз сўзини айтган бўлса-да, бу мундиал ёш футболчилар учун катта тажриба мактаби бўлди. Жумладан, 18 ёшли Беҳруз Каримов каби ёш истеъдодлар жаҳон даражасидаги футбол талабларини бевосита ҳис этишди.
Мутахассисларнинг фикрича, ушбу илк тарихий иштирок ва тўпланган катта тажриба тўрт йилдан сўнг бўлиб ўтадиган навбатдаги мундиалда жамоанинг янада кучлироқ бўлиб qayтишига хизмат қилади.
