FIFA rasmiy sayti mundial debyutantlaridan biri bo‘lgan O‘zbekiston milliy terma jamoasining JCH-2026 dagi ishtirokiga e’tibor qaratdi.
AQSH, Kanada va Meksika yashil maydonlarida o‘tkazilgan futbol bo‘yicha Jahon chempionatida O‘zbekiston milliy terma jamoasi o‘z tarixida ilk bor ishtirok etdi. Xalqaro futbol federasiyasi (FIFA) o‘z rasmiy manbasida Osiyo qit’asi vakillarining ishtirokiga to‘xtalib, “Oq bo‘rilar”ning turnirdagi tarixiy qadamlarini alohida e’tirof etdi.
Musobaqaning guruh bosqichida ketma-ket uchta mag‘lubiyatga uchrab, JCH bilan erta xayrlashgan bo‘lsa-da, Fabio Kannavaro shogirdlari ijobiy taassurot qoldira olishdi.
Ayniqsa, jamoa a’zolarining individual mahorati jahon jamoatchiligi e’tiborini tortdi:
-
Abbosbek Fayzullayev Kolumbiya terma jamoasi darvozasiga gol urib, O‘zbekistonning Jahon chempionatlaridagi ilk goli muallifi sifatida mamlakat futbol tarixidan joy oldi.
-
Eldor Shomurodov tomonidan Kongo DR terma jamoasi darvozasiga yo‘llangan ajoyib zarba esa “Hyundai” tomonidan o‘tkazilgan so‘rovnomada “Turnirning guruh bosqichidagi eng yaxshi goli” deb topildi.
FIFA tahlilchilarining ta’kidlashicha, O‘zbekiston terma jamoasi musobaqa davomida o‘zining murakkab, texnik va mehnatkash o‘yin uslubiga sodiq qoldi. Bahslar davomida yuqori temp va jismoniy toliqish o‘z so‘zini aytgan bo‘lsa-da, bu mundial yosh futbolchilar uchun katta tajriba maktabi bo‘ldi. Jumladan, 18 yoshli Behruz Karimov kabi yosh iste’dodlar jahon darajasidagi futbol talablarini bevosita his etishdi.
Mutaxassislarning fikricha, ushbu ilk tarixiy ishtirok va to‘plangan katta tajriba to‘rt yildan so‘ng bo‘lib o‘tadigan navbatdagi mundialda jamoaning yanada kuchliroq bo‘lib qaytishiga xizmat qiladi.
