Чилининг «Коло-Коло» клуби Кабо-Верде терма жамоасининг 40 ёшли дарвозабони Возиньяни ўз футболчиси сифатида ижтимоий тармоқларда таништирди.

Возинья 2026 йилги жаҳон чемпионатида тўртта ўйинда майдонга тушиб, уларнинг иккитасида ўз дарвозаси дахлсизлигини сақлаб қолди. «Коло-Коло»га ўтгунга қадар голкипернинг охирги клуби Португалия иккинчи дивизионидаги «Шавиш» бўлган эди. Ўтган мавсумда 40 ёшли дарвозабон барча турнирларда 19 та ўйинда иштирок этиб, шулардан 6 тасида дарвозаси дахлсизлигини сақлаб қолди. Transfermarkt порталида келтирилган маълумотларга кўра, футболчининг бозор қиймати 500 минг еврони ташкил этади.

Кабо-Верде терма жамоаси ўз тарихида илк бор жаҳон чемпионатининг финал босқичида иштирок этди ва 1/16 финалда Аргентинага (2:3) имкониятни бой бериб, мусобақадаги иштирокини якунлади.