Колумбиялик футболчи Хуан Кинтеро ўзининг ҳозирги клуби — Аргентинанинг «Ривер Плейт» жамоасини тарк этмоқда. Келишув томонларнинг ўзаро розилиги ва манфаати асосида бекор қилинди, дея аниқлик киритади Аргентинанинг энг кучли клубларидан бирининг матбуот хизмати.
Бироқ бу тинчгина хайрлашув эмас — аввалроқ Кинтеро клуб бош мураббийининг қарорларини анча кескин танқид қилган эди. Оқибатда, 2018 йилдан бери жамоа шарафини ҳимоя қилиб келаётган фахрий футболчига ўз жойи кўрсатиб қўйилди.
Кинтеро клубдаги илк мавсумидаёқ «Ривер Плейт»нинг XXI асрдаги энг муҳим голларидан бирига муаллифлик қилган эди — ўшанда у Мадридда ўтказилган Либертадорес Кубоги финалида «Бока Хуниорс» дарвозасини ишғол этганди.
