Мадриднинг «Реал» клуби президенти Флорентино Перес вингер Винисиус Жуниорнинг амалдаги шартномаси 2027 йилнинг ёзида якунига етишига қарамай, унинг нархини 160 миллион евро қилиб белгилади. Бу ҳақда Sport.es нашри хабар бермоқда.

Манбанинг маълумотига кўра, 160 миллион евродан кам бўлган таклиф тушган тақдирда «қаймоқранглилар» ҳатто музокаралар столига ҳам ўтиришмайди. Таъкидланишича, «Реал» ушбу суммага вингернинг сермаҳсуллиги ва жамоадаги фаолияти давомида қўлга киритилган совринларга қўшган ҳиссасини ҳам киритган.

Манба «Арсенал»нинг Винисиусга қизиқиш билдираётганини тасдиқлади, аммо клублар ўртасида ҳеч қандай музокаралар олиб борилмаётганини таъкидлади. «Канонирлар» футболчи «Реал» билан шартномасини узайтмаслиги аниқ бўлгачгина ҳаракатни фаоллаштиришади.