talkSPORT журналисти Алекс Крукнинг хабар беришича, «Ньюкасл» футболчини сотмаслик позициясида турганига қарамай, «Арсенал» ярим ҳимоячи Бруно Гимарайнс трансферини барибир якунлаши кутилмоқда.

Крукнинг фикрича, каттароқ таклиф вазиятни тубдан ўзгартириши мумкин. Агар «Ньюкасл» 80 миллион фунт стерлинг ёки ундан юқори миқдорда таклиф олса, ушбу битимга розилик бериши эҳтимолдан холи эмас.

«Бруно Гимарайнснинг «Арсенал»га ўтиши амалга ошади деб ўйлайман. «Ньюкасл» томонидан у сотилмайди деган гаплар янграётганини биламан, аммо бу масалада барибир пул ўз сўзини айтади. Агар улар 80 миллион фунтга яқин ёки ундан ортиқ таклиф олишса, трансфер амалга ошишини кутиш мумкин», — деди Крук.

Хабарларга кўра, «Арсенал» Гимараэс билан шахсий шартнома шартларини аллақачон тўлиқ келишиб олган ва Бразилия терма жамоаси аъзосининг ўзи ҳам «канонирлар» сафига қўшилишга қарши эмас.

Ярим ҳимоячини Микель Артета қўл остида юқори даражада тўп суриш ва йирик совринлар учун курашиш имконияти ўзига жалб қилмоқда.