ЖЧ-2014 саралашининг плей-офф босқичида Ўзбекистонни мағлуб этган Иордания миллий терма жамоаси аъзоларини мукофотлаш масаласи ҳали ўз ечимини топмаган.
Иордания ҳукумати Ўзбекистон билан ўйиндан аввал 15 минг динор (21 минг доллар) миқдорида терма жамоани мукофотлашга ваъда берганди. Иордания футбол ассоциацияси вице-президенти Салоҳ Сабрийнинг таъкидлашича, ҳукумат ҳали ўз ваъдасининг устидан чиқмаган.
"Ҳозирча ҳукумат сукут сақламоқда. Натижада уларга бўлган ишонч сўнмоқда. Бу орқали ҳукумат бизни ерга урмоқда. Ҳозирча эса Сенат ва парламент аъзоларининг ҳар бири терма жамоа аъзоларини мукофотлаш учун 100 динордан пул йиғишди", дейди Сабрий.
Салоҳнинг таъкидлашича, Иордания футбол ассоциацияси мукофотлар, авиачипталар, мураббийлар маоши, уларнинг яшаши билан боғлиқ харажатлар бўйича қарзлар 2 миллион динорга етган. Терма жамоани ноябрь ойида бўладиган Жанубий Американинг бешинчи жамоаси билан плей-офф ўйинига тайёрлаш учун эса яна 2 миллион динор пул керак. Сабрийнинг айтишича, ҳозирги кунда Ассоциация ҳисоб-рақамида бор-йўғи 846 динор пул бор холос.
"Биз ҳозир 1913 йилда эмас, 2013 йилда яшаётганимизни ҳукумат билмаяпти шекилли. Терма жамоа ҳозир профессионал футбол ўйнамоқда. Шунинг учун у ҳукуматнинг қўллаб-қувватлашига муҳтож" дея ёзади "Jordan times" газетаси.
