«Манчестер Сити» ва Франция терма жамоасининг собиқ ҳимоячиси, ҳозирда Польшанинг «Погонь» клубида тўп сураётган Бенжамен Менди Американинг Goldin аукцион уйи томонидан ташкил этилган киммошди савдосида ўзининг Жаҳон кубоги нусхасини сотди. Бу ҳақда L’Équipe нашри хабар беради.
2018 йилги Жаҳон чемпиони трофейнинг расмий нусхасини 25 июль куни якунланган аукционда 54 минг еврога сотган. Таъкидланишича, ушбу нарх бироз пасайтирилган, чунки текширув вақтида кубокнинг асос қисмида дарз кетиш ва енгил эскириш аломатлари аниқланган. Харидор трофей билан бирга Мендининг шахсий имзоси туширилган асллик сертификатини ҳам қўлга киритди.
