«Manchester Siti» va Fransiya terma jamoasining sobiq himoyachisi, hozirda Polshaning «Pogon» klubida to‘p surayotgan Benjamen Mendi Amerikaning Goldin auksion uyi tomonidan tashkil etilgan kimmoshdi savdosida o‘zining Jahon kubogi nusxasini sotdi. Bu haqda L’Équipe nashri xabar beradi.
2018 yilgi Jahon chempioni trofeyning rasmiy nusxasini 25 iyul kuni yakunlangan auksionda 54 ming yevroga sotgan. Ta’kidlanishicha, ushbu narx biroz pasaytirilgan, chunki tekshiruv vaqtida kubokning asos qismida darz ketish va yengil eskirish alomatlari aniqlangan. Xaridor trofey bilan birga Mendining shaxsiy imzosi tushirilgan asllik sertifikatini ham qo‘lga kiritdi.
