Madridning "Atletiko" klubi hujumchisi Xulian Alvaresning kelajagi hamon noaniqligicha qolmoqda.
Argentinalik futbolchi "Barselona"ga o‘tish niyatida qat’iy turibdi. Biroq "Atletiko" rahbariyati uni deyarli istalgan klubga sotishga tayyor bo‘lsa-da, aynan kataloniyaliklarga qo‘yib yuborishni istamayapti.
Jurnalist Gaston Edul fikricha, "Barselona" transferni joyidan siljitish uchun yanada faolroq harakat qilishi kerak.
"Xulian sahna ortida qo‘lidan kelgan barcha ishni qilyapti. Ammo "Barselona" ham jarayonni biroz oldinga surishi zarur. Ular taklif qilgan 100 million yevrodan ko‘proq pul berishlari kerak. Yana bir qadam tashlash shart", — dedi argentinalik futbol bo‘yicha ixtisoslashgan jurnalist.
Xulian Alvares uchun kurashda "Arsenal" ham hali qolmoqda. Biroq futbolchining o‘zi Angliyaga qaytishga katta qiziqish bildirmayapti.
