ФИФА президенти Джанни Инфантино мусобақалар ҳуқуқларини хусусий қўлларга топшириш ғояси амалга оширилмаслигини маълум қилди. УEФА бунга жавобан ўз баёнотини эълон қилди.
УEФА ФИФАнинг ушбу режадан воз кечиш қарорини олқишлаб, «ФИФА президентига футбол сотилмаслигини тушунтириб қўйган» барчага миннатдорчилик билдирди. Яқин орада УEФА бу каби ғоялар бошқа пайдо бўлмаслигини кафолатлайдиган режа ишлаб чиқиш учун асоциациялар билан ишлашни давом эттиради.
УEФА футболда ҳеч қандай яширин схемалар бўлмаслиги кераклигини таъкидлади. Бундан ташқари, ташкилот ФИФА президенти лавозимига киришаётганда шаффофликни ваъда қилган Джанни Инфантинони кескин танқид қилди:
«ФИФАнинг ҳозирги раҳбарияти нафақат УEФАнинг, балки бутун футбол ҳамжамиятининг кўплаб вакиллари олдида ишончни йўқотди. Инфантино ўз ваъдаларини бажармади. У тайёрлаган ва амалга оширишга уринган шаффоф бўлмаган, саҳна ортидаги ва шубҳали келишув очиқлик ва шаффофликдан ташқари ҳамма нарса эди», — дейилади УEФА баёнотида.
УEФА, шунингдек, ФИФАга бўлган ишончни қайта тиклаш бўйича ишлар эндигина бошланаётганини алоҳида қайд этди.
