Африка футбол конфедерацияси (КАФ) Жаҳон чемпионати ҳуқуқларининг бир қисмини хусусий инвесторларга сотиш режаси сабаб босим остида қолган ФИФА президенти Жанни Инфантинога ўз хайрихоҳлиги ва қўллаб-қувватловини билдирди.
Чоршанба, 5 август куни Инфантино Рабатда ФИФА раҳбарияти билан шошилинч учрашув ўтказиб, FIFA Forward Enterprise тижорий лойиҳасини илгари суришда йўл қўйилган хатолар учун узр сўради.
«КАФ ФИФА президенти Жанни Инфантино ва бош котиб Маттиас Графстрёмнинг қўшма баёнотини олқишлайди ва қўллаб-қувватлайди. КАФ Африка футболини ривожлантиришга асосий эътиборини қаратишда давом этади, федерация амалдаги бошқарув ва шаффофлик тамойилларига содиқлигини яна бир бор тасдиқлайди», — деди КАФ президенти Патрис Мотсепе.
Баёнотда, шунингдек, КАФ ижроия қўмитаси бир овоздан Инфантинони қўллаб-қувватлагани ва Африка футболига кўп йиллардан бери кўрсатиб келаётган ёрдами учун миннатдорчилик билдиргани қайд этилган. Алоҳида миннатдорчилик муваффақиятли деб топилган ЖЧ-2026 турнирини ташкил этгани учун билдирилди.
Олдинроқ Инфантино Жаҳон чемпионатининг тижорий ҳуқуқлари бир қисмини хусусий инвесторларга сотиш ташаббуси билан чиққан, бироқ кескин танқидлардан сўнг бу ғоядан воз кечган эди. Лойиҳа ФИФАнинг асосий эркаклар ва аёллар турнирларини бошқариши керак бўлган FIFA Forward Enterprise компаниясини ташкил этишни назарда тутган эди. Ташкилот ушбу схема тахминан 4,2 миллиард доллар даромад келтириши мумкинлигини таъкидлаган, аммо бу ташаббус футбол функциянерлари, миллий федерациялар ва бошқа ташкилотлар томонидан кескин қаршиликка учради.
