«Интер Майами»нинг бизнес операциялари бўйича президенти Хавьер Асенси жамоа ҳужумчиси Лионель Месси келажакда футболчилик фаолиятини якунлаганидан сўнг клубда қандай роль бажариши мумкинлиги ҳақида гапирди.

«Месси энди футбол ўйнамайдиган вақт келади. Бу ҳақда гапириш оғир, аммо бу аниқ: у яна 15 йил давомида футбол ўйнай олмайди. Леонинг фаолиятидан кейинги давр ҳақида ўйламаслик бемаънилик бўлар эди. Аммо у футбол ўйнашни хоҳлар экан, майдонга тушаверсин. У қачон фаолиятини якунлашни мустақил ҳал қилиш ҳуқуқини бошқалардан кўра кўпроқ ҳақли.

Ғоя шундан иборатки, Месси фаолиятини якунлаганидан кейин ҳам ўзини «Интер»га бағишлашда давом этиш имкониятига эга бўлади. Ҳозирги қоидаларга кўра, у клубнинг ҳаммуассиси бўла олмайди, чунки МЛС қоидалари бунга рухсат бермайди. Аммо у футбол ўйнашни тўхтатиши биланоқ «Интер» акциядорларидан бирига айланади», — дея Асенсининг сўзларини Marca келтирган.