«Фейеноорд» ҳужумчиси Аясе Уэда фаолиятини «Фенербахче»да давом эттириши мумкин.

VI.nl маълумотига кўра, Туркия клуби 27 ёшли япониялик футболчи учун жиддий таклиф берган. «Фейеноорд» эса ҳужумчининг жамоадан кетиши бўйича таклифни кўриб чиқишга тайёр.

Voetbal International хабар беришича, Уэдага қизиқиш бир неча ҳафтадан буён сақланиб келмоқда. Аввалроқ ҳужумчига «Брайтон» ва «Лидс» клублари ҳам қизиқиш билдирган, аммо уларнинг ҳеч бири футболчи учун расмий таклиф бермаган.

«Фенербахче» эса Уэдага қизиқишни амалий ҳаракатга айлантирган биринчи клуб бўлди. Истанбулликлар «Фейеноорд»га япон ҳужумчиси бўйича расмий таклиф юборган.

Уэда ўтган мавсумда барча мусобақаларда 40 та учрашувда 26 та гол ва 2 та голли узатма қайд этди. Transfermarkt портали футболчининг бозор қийматини 20 миллион еврога баҳоламоқда.